Arma nuclear

Una arma nuclear ye una arma que xenera una gran cantidá d'enerxía a partir d'una reaición de fisión o de fusión nuclear. Esti tipu d'armes tienen una gran capacidá destructiva, y son les más potentes de les que s'emplegaren enxamás. Anguaño, namái qu'un grupu rellativamente pequeñu de países reconoz que dispón d'elles. Dixébrense en dos clases acordies col so mecanismu d'actuación: Les denomaes bombes atómiques o bombes A son les qu'utilicen una reaición nuclear de fisión. Les denomaes bombes d'hidróxenu o bombes H utilicen una reaición nuclear de fusión y son muncho más potentes que les otres. Les armes nucleares adopten bien de formatos y puen ser llanzaes dende aviones o per aciu de cohetes y misiles dende somarinos, portaviones, bases militares, etc. Les armes nucleares empléguense como una estratexa de demostración de superioridá y una amenaza, en bas al conceutu de disuasión nuclear. En tiempu de guerra namái que s'emplegaron en dos ocasiones: N'Hiroshima el 6 d'agostu de 1945 y en Nagasaki trés díes depués. Los tipos de bombes emplegaos foron una bomba d'uraniu y una de plutoniu (les dos yeren bombes A). 120.000 persones morrieron nel intre y el doble por mor de los efeutos a mediu y llargu plazu d'estes armes. D'entós p'acá, esplotaron unes 2.000 bombes nucleares, bien d'elles como prebes, per parte de siete estaos: Los Estaos Xuníos, La Xunión Soviética, Francia, El Reinu Xuníu, China, India y Paquistán. Sospéchase de qu'otros países tienen capacidá nuclear, y caltiénenlo en secretu.